ShQO-da jyl basynan beri 100-den astam ruqsat etilmegen qoqys úıindisi joıyldy
ÓSKEMEN. QazAqparat – Shyǵys Qazaqstan oblysynda bıyl 100-den astam ruqsat etilmegen qoqys úıindisi joıylǵan, dep habarlaıdy QazAqparat tilshisi.
ShQO Ekologııa departamenti baspasóz qyzmetiniń málimetinshe, qoqysty ruqsat etilmegen jerge tastaǵandardy anyqtaý jáne stıhııalyq qoqys úıindilerin joıý maqsatynda Ulan aýdanynda reıd júrgizildi. Sharaǵa departament mamandary, aýdan ákiminiń orynbasary Bolathan Rınat jáne Tavrııa aýyldyq okrýginiń ákimi Danııar Ýahıtov qatysqan.
«Osyǵan deıin Shúlbi sý qoımasy men Semeı qalasyndaǵy Ertis ózeniniń jaǵalaýlarynda reıd júrgizilgen bolatyn. Kezekti shara Ulan aýdanynda ótkizildi. Nátıjesinde, Tavrııa aýyldyq okrýgi aýmaǵynda ruqsat etilmegen qoqys úıindisi anyqtaldy. Jergilikti atqarýshy organ ókilderiniń kúshimen sol jer qoqystan tolyqtaı tazartyldy», - delingen aqparatta.
Departament ókilderiniń aqparatyna súıensek, jyl basynan beri oblysta 568 qoqys úıindisi anyqtalyp, búginde onyń 100-den astamy joıylǵan.
