ShQO-da jyl basynan beri 10-nan astam kólik órtendi
ShQO Tótenshe jaǵdaılar departamenti baspasóz qyzmetiniń málimetine súıensek, osy jyldyń basynan beri óńir boıynsha 10-nan astam kólik órtendi.
«Sońǵy oqıǵalardyń biri Altaı aýdany Serebrıansk qalasynda boldy. Jeńis kóshesinde toqtap turǵan 1992 jyly shyqqan «Volkswagen Golf» markaly avtokóliginde órt shyqty. Órt sóndirý bólimshesiniń qyzmetkerleri kelgen kezde kóliktiń qozǵaltqysh bóligi, aspaptar paneli, aldyńǵy dońǵalaqtary janyp jatty. Órt sóndirýshiler kóp uzamaı 2 sharshy metr aýmaqtaǵy jalyndy aýyzdyqtady. Aldyn ala derek boıynsha tilsiz jaýdyń shyǵý sebebi – qaýiptiligi joǵary agregatpen abaısyz jumys isteý», - delingen aqparatta.
Qutqarýshylardyń aıtýynsha, avtokólikter negizinen 5-6 mınýt ishinde tolyq janyp ketýi múmkin. Kóbinese órt qozǵaltqysh bóliginde shyǵady, al salonda óte sırek. Órt sebebi otyn men basqa suıyqtyqtardyń aǵýynan bolýy múmkin. Kólikterdiń maı tamshysynan nemese antıfrızden janǵan jaǵdaılar da bar.
«Aıazda keıbir avtokólik júrgizýshileri toqtaǵan kezde tez sýyp ketpes úshin qozǵaltqyshty kıizben oraıdy. Nátıjesinde, qozǵaltqyshty jylytýǵa az benzın jumsalady. Biraq órt qaýipsizdigi erejeleri boıynsha bulaı isteýge bolmaıdy. Mundaı kórpe janbaıtyn materıaldan jasalǵan bolsa da qaýipti. Sebebi mata qozǵaltqyshpen janasady, qyzady jáne erte me, kesh pe tútindeı bastaıdy», - delingen habarlamada.
Foto: TJD