ShQO-da júrip kele jatqan eki kólikten órt shyqty
ÓSKEMEN. QazAqparat - Shyǵys Qazaqstan oblysynda demalys kúnderi úsh jeńil kólik órtten zardap shekti, dep habarlady «QazAqparat» HAA tilshisi Tótenshe jaǵdaılar departamentine silteme jasap.
Atap aıtqanda, Óskemen-Semeı tas jolynda qozǵalys ústindegi «BMV» jeńil kóliginiń motor bóliginen órt shyqty. Jalyn mashınanyń ishki jaǵyn, kýzovtyń syrtyn jáne júk salǵysh bóligin sharpydy. Jalyndy oqıǵa ornyna jetken órt sóndirýshiler aýyzdyqtady. Qurbandar joq.
Ekinshi oqıǵa Zaısan aýdanynda boldy. Zaısan-Terekti jolynda «Aýdı» kóligi órtke oranǵan. Órt sóndirýshiler shaqyrylǵan joq, oqıǵa materıaldaryn jınaýmen tótenshe jaǵdaılar bóliminiń bas mamany júrgizdi.
Táýlik ishindegi avtokólikterdiń úshinshi janý oqıǵasy Semeıdiń Dýlatov kóshesi boıynda boldy. Órt avtoturaqta turǵan «Folksvagen Passattyń» motor bóliginen shyqqan.
Júrgizýshiniń baǵyna qaraı, órt sóndirýshiler birneshe mınýtta jetip, tilsiz jaýdy dereý aýyzdyqtap úlgerdi.
TJD aqparatyna sáıkes, jyl basynan beri kólikterdiń janýyna qatysty 110 fakti tirkelgen. Olardyń basym bóliginde júrgizýshilerdiń órtke qarsy qaýipsizdik sharalaryna selsoq qaraýy sebep bolýda.
