ShQO-da júrgizýshi tirkemesi órtengen júk kóligimen birneshe shaqyrym júrip ótken
ÓSKEMEN. QazAqparat – Shyǵys Qazaqstan oblysynda júrgizýshi tirkemesi órtengen júk kóligimen birneshe shaqyrym júrip ótken, dep habarlaıdy QazAqparat tilshisi.
ShQO TJD baspasóz qyzmetiniń málimetine súıensek, búgin respýblıkalyq mańyzy bar «Almaty-Óskemen» tasjolynyń 680-shaqyrymynda kele jatqan júk kóliginiń tirkemesin jalyn sharpyǵan. Er adamǵa órt shyqqany jaıly basqa júrgizýshiler belgi berdi. Ol toqtaǵan kezde tirkemesiniń órtenip jatqanyn kórip, dereý «101» nómirine habarlasty da, tirkemeni kólikten ajyratqan.
Jaqyn mańda júrgen tıegish otqa oranǵan tirkemeni joldan bir shetine qaraı ysyryp tastady. Jol qyzmetiniń jumysshylary jalyndy qarmen basyp óshirmek boldy, alaıda ot des bermegen.
«Oqıǵa ornyna birinshi bolyp Taskesken aýylyndaǵy órt sóndirý bóliminiń jeke quramynan 2 adam men 1 avtotsısterna kelip jetti. Olar lezde tilsiz jaýdy sóndirýge kirisken. Kómekke №17 órt sóndirý bólimen 5 adam men 1 avtotsısterna keldi», - delingen habarlamada.
Órttiń jalpy aýdany - 19,2 sharshy metrdi quraǵan. Jalynnyń shyǵý sebebi – qaýiptiligi joǵary agregatpen abaısyz jumys atqarýdan bolýy múmkin.
Aıta keteıik, 2021 jyldyń basynan beri Shyǵys Qazaqstanda 45 avtokólik órtengen.
