ShQO-da júrek-qan tamyr aýrýlarynan kóz jumǵandar sany artty

ÓSKEMEN. KAZINFORM – Shyǵys Qazaqstan oblysynda qan aınalymy júıesi aýrýlarynan qaza bolǵandar sany artyp barady.

Bul týraly ShQO Densaýlyq saqtaý basqarmasy basshysynyń orynbasary Aınash Qapanova óńirlik kommýnıkatsııalar qyzmetinde ótken brıfıng barysynda málimdedi.

- 2025 jyldyń birinshi toqsanynda óńirdegi jalpy ólim-jitim kórsetkishi 7%-ǵa tómendegen. Alaıda júrek-qan tamyr aýrýlarynan kóz jumǵandar sany 5,2%-ǵa artty, - deıdi ol. 

Asa alańdatarlyq jaǵdaı Ulan aýdanynda tirkelgen. Bul kórsetkish munda 1,6 esege artqan. Al Rıdder qalasynda - 1,4 ese, Tarbaǵataı aýdanynda - 1,3 ese ósken.

- Qan aınalymy júıesi aýrýlary áli de ólim-jitim sebepteriniń aldyńǵy qatarynda. Bul medıtsınalyq kómektiń qoljetimdi bolýyn ǵana emes, turǵyndardyń densaýlyǵyna jaýapkershilikpen qaraýyn da talap etedi, - dedi Aınash Qapanova.

Óńirde júrek-qan tamyr aýrýlaryn erte anyqtaý úshin skrınıng júrgizilip jatyr. 1 maýsymǵa deıin josparlanǵan 3272 adamnyń 2369-y (72%) tekserýden ótken. 55 adamda patologııa anyqtaldy: 48-i arterııalyq gıpertonııa, 7-i júrektiń ıshemııalyq aýrýy. 36 patsıent dıspanserlik esepke alynǵan.

Eske salsaq, osyǵan deıin Óskemende dárigerler ınsýlt alǵan 19 jastaǵy qyzdy aman alyp qalǵany jaıly jazǵanbyz.