ShQO-da juma namazynda jamaǵat qýǵyn-súrgin jáne asharshylyq qurbandaryn eske aldy

NUR-SULTAN. QazAqparat - Shyǵys Qazaqstan oblysynda HH ǵasyrdyń 30 jyldaryndaǵy saıası qýǵyn-súrgin jáne asharshylyq qurbandaryn eske alýda, dep habarlaıdy ShQO aqparat ortalyǵy.

Álem musylmandary úshin qadirli bolyp sanalatyn Ramazan aıynyń sońǵy jumasy bizdiń elimizde 31 mamyr - Saıası qýǵyn-súrgin jáne asharshylyq qurbandaryn eske alý kúnimen tuspa-tus keldi. Osy qaıǵyly kúnge oraı Shyǵys Qazaqstan oblysynyń barlyq meshitterinde juma namazyna jınalǵan jamaǵatqa ýaǵyzben birge zobalań jyldardy bastan keshken qazaq halqynyń tarıhy týraly da aıtyldy. Atap aıtar bolsaq, bir ǵana Óskemen qalasyndaǵy «Halıfa Altaı» meshitine jınalǵan 3 myńnan astam jamaǵat jınaldy. QMDB-nyń Óskemen aımaqtyq ókil ımamy Ermek qajy Muqataı zobalań jyldardy bastan keshken halyqtyń zary, keshken muńy, júrip ótken tar joldary búgingi beıbit zaman urpaqtarynyń esinde máńgi saqtalatynyn, bul kúnniń Qazaqstan úshin aıryqsha maǵynaǵa ıe ekendigin atap aıtty.

Óziniń ýaǵyzynda Ermek Muqataı "Qazaqstanda 103 myń adam qýǵyn-súrginge ushyrap, 25 myń adam atý jazasyna kesildi. Olardyń ishinde qazaqstandyq ǵylym, mádenıet, óner, zııaly qaýym men qoǵam ókilderi boldy. Bul sanǵa jappaı asharshylyqtyń qurbandaryn qosyńyz. Bolashaq urpaqty ótkenniń qateliginen saqtaý úshin, xalqymyzdyń sol qasireti týraly estelikti saqtaý mańyzdy" ekenin aıtty.

Ýaǵyz sońynda QMDB-ǵa qarasty oblys aýmaǵyndaǵy barlyq meshitterde qýǵyn-súrgin qurbandaryn eske alý kúnine oraı Quran baǵyshtap, ótken tarıxqa taǵzym etip tarqasty.