ShQO-da júkti áıel qutqaryldy
ÓSKEMEN. QazAqparat - Shyǵys Qazaqstannyń Kúrshim aýdanynda ana men balanyń ómirin «Qazáýequtqarý» mekemesiniń ushqyshtary qutqaryp qaldy, dep habarlaıdy QazAqparat tilshisi.
Shytyrman oqıǵaly fılmge uqsas jaǵdaı Kúrshim aýdanynyń Marqakól aýylynda bolǵan. 12 tamyz kúni tolǵaq qysqan áıeldiń densaýlyǵy múshkil ekenin bilgen dárigerler naýqasty oblys ortalyǵyna shuǵyl túrde jetkizý qajet degen sheshimge keledi. Alaıda, kún jańbyrly bolǵandyqtan, «Qazáýequtqarý» mekemesine tikushaq shyǵarýǵa bolmaıtyn bolǵan. Adam ómirin qutqarýda árbir sekýnd mańyzdy ekenin biletin dárigerler ýaqyt joǵaltpastan, júkti áıeldi jedel járdem kóligine salyp jolǵa shyǵady. Bul kezde «Qazáýequtqarý» mekemesiniń ekıpaj komandıri Andreı Býhal men ushqysh Danııar Toqtaruly aýa raıynyń qubylýyn baqylap, kezekshilikte otyrǵan. Naýqastyń baǵyna oraı, aspan kenet ashylyp, tikushaq ekıpajy jedel járdem kóligindegi dárigerler men naýqasty orta joldan alyp ketken.
«Tikushaq jedel járdem kóligin Kúrshim aýdanynyń aýmaǵynda qýyp jetti. Sonyń arqasynda júkti áıel oblys ortalyǵyna der kezinde jetkizildi. Jyl basynan beri «Qazáýequtqarý» mekemesiniń ushqyshtary Shyǵys Qazaqstanda 84 qutqarý operatsııasyna qatysty. Olardyń 70 paıyzynda jańa týǵan nárestelerge kómek kórsetilgen» - deıdi oblystyq tótenshe jaǵdaılar departamenti baspasóz qyzmetiniń mamany Natalıa Bolshakova.
