ShQO-da josparly medıtsınalyq kómek qaıta jandandy
ÓSKEMEN. QazAqparat – Shyǵys Qazaqstan oblysynda josparly medıtsınalyq kómek qaıta jandandy, dep habarlaıdy QazAqparat tilshisi.
«Áleýmettik medıtsınalyq saqtandyrý qory» kommertsııalyq emes aktsıonerlik qoǵamy ShQO boıynsha fılıalynyń málimetinshe, 50-den astam medıtsınalyq uıym naýqastardy qabyldaýdy bastady. 17 tamyzdan beri kardıologııalyq kómek kórsetý statsıonary, kardıohırýrgııa, ortopedııa, hırýrgııa, gınekologııa, ýrologııa, barlyq pedıatrııalyq jáne terapevtik profılder, ońaltý, júkti áıelderdi aýrýhanaǵa jatqyzý, pallıatıvti kómek kórsetý qaıta júrgizilýde.
Sonymen qatar ambýlatorlyq-emhanalyq kómek qaıta kórsetilýde. Alǵashqy medıtsınalyq-sanıtarlyq kómek berý uıymdary men stomatologııalar qabyldaý júrgizýde. Sondaı-aq josparly konsýltatıvti-dıagnostıkalyq qyzmet te uıymdastyrylady.
«Provızorlyq statsıonardyń jemisti jumysynan soń biz naýqastardy josparly túrde ekinshi jáne úshinshi kezeń boıynsha ońaltýdy bastadyq. Demek, jaraqat, ortopedııa, nevrologııa, kardıologııa bólimderi oıdaǵydaı jumys istep tur. Patsıentter joldama boıynsha joǵary tehnologııalyq kómek kórsetetin emhanada nemese statsıonarda ońaltýdan óte alady. Júrekke, býyndarǵa, omyrtqaǵa, mıǵa jáne jaraqat ornyna ota jasatýǵa bolady», - deıdi Shyǵys Qazaqstan oblystyq ońaltý ortalyǵynyń bas dárigeri Tımýr Tortaev.
20 tamyzdan bastap statsıonarlarda, bólimshelerde, ońaltý kezinde statsıonar almastyrǵysh tehnologııalar jumys istemek. Sondaı-aq skrınıng pen profılaktıkalyq tekserý jumystary qaıta jandanady.
ShQO Densaýlyq saqtaý basqarmasynyń málimetinshe, oblysta 4731 ınfektsııalyq jáne provızorlyq tósek-oryn bar. COVID-19 ınfektsııasyna shaldyqqan naýqastarǵa arnalǵan tósekterdiń 16,5 paıyzy bos emes.
Karantınniń jeńildetilgenine qaramastan Shyǵys Qazaqstandaǵy medıtsına qyzmetkerleri óńir turǵyndaryn barlyq qaýipsizdik sharalaryn saqtap, maska kıip, buqaralyq otbasylyq sharalardy uıymdastyrmaı, salaýatty ómir saltyn ustanýǵa shaqyrady.
