ShQO-da jóndeýge baılanysty jabylǵan respýblıkalyq jol ýchaskesi qaıta ashyldy
ÓSKEMEN. KAZINFORM – Shyǵys Qazaqstan oblysy Katonqaraǵaı aýdanyndaǵy Rahman qaınaryna aparatyn joldaǵy shekteý alynyp tastaldy.
«KAJservıs» JShS oblystyq fılıalynyń málimetine súıensek, atalǵan jol ýchaskesindegi bıylǵa josparlanǵan jóndeý jumystary aıaqtaldy.
- 30 qazan kúni saǵat 8:00-den bastap josparly qurylys-montaj jumystarynyń aıaqtalýyna baılanysty respýblıkalyq mańyzy bar Óskemen-Altaı-Úlken Naryn-Katonqaraǵaı-Rahman qaınary baǵytyndaǵy joldyń Qaraaıryq aýyly men Rahman qaınary shıpajaıy aralyǵyndaǵy ýchaskesinde barlyq kólik túrleriniń qozǵalysyna ruqsat etildi, - delingen aqparatta.
Aıta keteıik, kólik júrgizýshileri joldaǵy shekteýlerge qatysty aqparatty táýlik boıy jumys isteıtin 1403 baılanys ortalyǵyna habarlasyp ala alady.
Eske salsaq, osyǵan deıin Almatyda opyrylǵan joldan keıin tehnıkalyq qadaǵalaý kompanııasy akkredıtteýden aıyrylǵany habarlanǵan.