ShQO-da joldy sý basyp, 200-ge jýyq turǵyn kóshirilýde
ÓSKEMEN. QazAqparat - Kókpekti aýdanynyń Samar aýylynda qutqarýshylar jaǵalaýǵa jaqyn mańda turatyn turǵyndardy qaýipsiz jerge kóshirip jatyr, dep habarlaıdy QazAqparat tilshisi ShQO Tótenshe jaǵdaılar departamentine silteme jasap.
Sý deńgeıiniń kóterilýi tasqyn qaýpin týyndatty. Qutqarýshylar Samardyń jaǵalaý mańyndaǵy turǵyndaryn kóshirip jatyr. Kókpekti aýdandyq tótenshe jaǵdaılar bólimi bastyǵynyń sózine qaraǵanda, shamamen 90 úıdiń 200 turǵynyn evakýatsııalaý qajet. Alaıda turǵyndardyń basym kópshiligi budan bas tartyp otyr.
Turǵyndar mektep jáne Agrarlyq kolledj bazasyndaǵy eki evakýatsııa beketine ornalastyrylady.
«Óskemen-Samar» avtojolynyń 132-kılometrinde erigen qar sýy tasyp, 50 metrdeı jerdi basqan.
TJD, jergilikti bılik jáne polıtsııa oqıǵa ornynda jumys istep jatyr.
Aıta keteıik, sınoptıkter ShQO-da aldaǵy kúnderi kún jyly bolatyndyǵyn, jaýyn-shashynǵa baılanysty sý deńgeıiniń kóterilý qaýpi bar ekenin eskertedi.
ShQO TJD daǵdarys ortalyǵynda jedel shtab, sondaı-aq shuǵyl jeliniń 55-38-19 nómiri jumys istep tur.
