ShQO-da joldar ashyldy
ShYǴYS QAZAQSTAN OBLYSY. QazAqparat – Shyǵys Qazaqstan oblysynda 3 jolaýshylar avtobýsy men 19 jeńil kólik qar qursaýynda qaldy, dep habarlaıdy QazAqparat ShQO TJD baspasóz qyzmetine silteme jasap.
Demalys kúnderi burqasyn bolyp, jol kórinbegendikten respýblıkalyq jáne oblystyq mańyzdaǵy tasjoldar jabyldy. Eskertýge qaramastan, qutqarýshylar qala syrtyndaǵy avtojoldarǵa barýǵa májbúr boldy.
Semeı qalasynan 30 km jerdegi «Omsk-Maıqapshaǵaı» tasjolynyń 786-kılometrinde jeńil kólikter turaqtap qalǵan.
«ShQO TJD men «Qazavtojol» JShS qyzmetshileri jabylǵan jol aýmaǵynan ishinde 37 adamy bar 19 jeńil kólikti Semeıge deıin jetkizdi. Al «Almaty-Óskemen» tasjolynyń 683-kılometrinde, Taskesken aýylynan 10 km qashyqtyqtaǵy jabyq jerde Almaty-Semeı jáne Tarbaǵataı-Almaty baǵytyndaǵy 3 avtobýs toqtap qalǵan.
Salonda 55 adam bolǵan. Jolaýshylar jylytý pýnkterine ornalastyrý týraly ákimdik usynysynan bas tartty. Medıtsınalyq kómek qajet bolmady», - dep túsindirdi ShQO TJD baspasóz qyzmeti.
Qazirgi ýaqytta Shyǵys Qazaqstan oblysyndaǵy barlyq jol ashyq. Degenmen, TJD mamandary ShQO turǵyndaryna saparǵa shyqpas buryn aýa raıynyń jaǵdaıyn bilip otyrý qajettigin eskertti.
Oral Erlanuly