ShQO-da jolda qalǵan eki avtobýstyń 56 jolaýshysy sport mektebine ornalastyryldy
ÓSKEMEN. QazAqparat – Shyǵys Qazaqstan oblysy Aıagóz aýdanynda aýa raıynyń qolaısyzdyǵyna baılanysty jolda qalǵan eki avtobýstyń 56 jolaýshysy sport mektebine ornalastyryldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, qutqarýshylar qar qursaýynda qalǵan kólik júrgizýshilerine kómek kórsetýde.
«8 aqpan keshki saǵat 20.00-de «Kúrshim-Zaısan» tasjolynda Amanat aýylynan 11 shaqyrymdaı jerde 3 jolaýshysy bar «Lexus-470» kóligi qarǵa batqan. Oqıǵa ornyna birden №30 órt sóndirý bóliminiń qyzmetkerleri attandy. Alaıda olar jol jónekeı qar qursaýynda qamalǵan «Subaru Forester» kóligin kórgen. Qutqarýshylar eki kólikti de shyǵaryp, Kúrshim aýylyna deıin jetkizdi» dep habarlady vedomstvo ókilderi.
Sonymen qatar 9 aqpanda saǵat 03.35-te «112» jelisine «Semeı-Maqanshy» tasjolynda kele jatqan eki avtobýs júrgizýshisi habarlasyp, kómek surady.
Anyqtalǵandaı, qoǵamdyq kólikter aýa raıynyń qolaısyzdyǵyna baılanysty Aıagóz qalasynda toqtaýǵa májbúr bolǵan.
Osy rette jergilikti atqarýshy organ ókilderi 56 jolaýshyny ýaqytsha Aıagóz sport mektebine ornalastyrdy.
