ShQO-da jolda qalǵan avtobýstan 11 jolaýshy qutqaryldy
ÓSKEMEN. QazAqparat – Shyǵys Qazaqstan oblysynda jolda qalǵan avtobýstan 11 adam evakýatsııalandy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, «Almaty-Óskemen» tasjolynyń 932 shaqyrymyndaǵy Jarma aýdany Balyqtykól aýylynda avtobýs synyp qalǵan.
Semeı men Almaty qalalarynyń arasynda qatynaıtyn avtobýstyń ishinde 15 jolaýshy bolǵan.
Onyń ishinde 5 bala bar. Oqıǵa ornyna qutqarýshylar shuǵyl kelip jetti.
«№32 órt sóndirý bóliminiń qyzmetkerleri qoǵamdyq kólikten 11 adamdy, onyń ishinde 5 balany evakýatsııalady. Olar Jańaózen aýylyndaǵy sporttyq lagerge ornalastyryldy. Al 2 júrgizýshi men 2 jolaýshy evakýatsııalanýdan bas tartqan», - delingen aqparatta.
Osy rette qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.
