ShQO-da jolda qalǵan avtobýstan 10-nan astam adam evakýatsııalandy
ÓSKEMEN. QazAqparat – Shyǵys Qazaqstan oblysynda jolda qalǵan avtobýstan 10-nan astam adam evakýatsııalandy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary Tileýjan Lepesov men Bekzat Muhamedjanov patrýldeý kezinde jolda turǵan avtobýsty kórgen. Salonda 15 adam, onyń ishinde 5 bala jáne 15 ıt boldy.
«Anyqtalǵandaı, olar Semeıden Almaty qalasyna ıt jarysqa qatysýǵa bara jatty. Alaıda túnde ıtterdi tamaqtandyratyn ýaqyt kelgende salondaǵy jaryq sónip qalǵan. Buǵan avtobýs regeneratorynyń isten shyqqany sebep boldy.
Jaǵdaımen tanysqan polıtseıler aldymen áıelder men balalardy evakýatsııalaý úshin TJD qyzmetkerlerin shaqyrýdy usynǵan. Biraq júrgizýshiler ózderi kólikti jóndeı alatynyn aıtyp, olarǵa ýaqyt berýdi surady», - delingen aqparatta.
Basqa kólikter qarańǵy ýaqytta avtobýsty baıqamaı qalmaýy úshin polıtsııa qyzmetkerleri patrýldik kóliktiń arnaıy jaryq shamdaryn qosty. Biraz ýaqyt ótken soń endi kútýge bolmaıtynyn túsingen saqshylar azamattar bir jerde túnep shyǵýy úshin qutqarýshylardan kómek suraǵan.
«TJD qyzmetkerleri oqıǵa ornyna 30 mınýt ishinde kelip jetti. Jańaózen aýylyndaǵy sanatorıılerdiń birine ornalastyrý úshin 11 adamdy evakýatsııalady. Al uıyqtaýǵa arnalǵan qaptardy alǵan tórt jolaýshy avtobýstyń ishinde ıttermen birge avtoelektrshiniń kelýin kútý úshin qalǵan. Kelesi kúni túske taman avtobýs jóndelip, júrgizýshiler men sportshylar saparlaryn jalǵastyrdy», - delingen málimette.
