ShQO-da jolaýshylar avtobýsy aýdarylyp qaldy
ASTANA. QazAqparat - Boranda Óskemennen Rıdder qalasyna shyqqan jolaýshylar avtobýsy jol apatyna ushyrady, dep habarlaıdy QazAqparat ShQO TJD baspasóz qyzmetine silteme jasap.
«Aldyńǵy kúnnen bastap daýyldyń bolatyny týraly eskertilip keledi. Shyǵys Qazaqstannyń keıbir óńirlerinde jyly bolyp tur. Buǵan qosa 30 metr/sekýndtyq qatty jel bar. Osyǵan baılanysty ShQO-da keshe birqatar respýblıkalyq jáne oblystyq joldar jabylǵan edi. Keıbir joldarda reıstik avtobýs pen aýyr júk kólikterine shekteý qoıylǵan. Óskemen - Rıdder jolyna keshe shekteý qoıylǵanymen, búgin tańerteń bul shekteý alynyp tastalǵan. Osylaısha, tańerteń reıstik avtobýs Rıdderge jol tartqan. Bystrýha aýylynyń tusynda óte bergende, júrgizýshiniń aıtýynsha, róldik basqarýda másele týyndap, jol-kólik oqıǵasy oryn alǵan», - dep habarlaıdy ShQO TJD baspasóz qyzmetinen Anastasııa Sklıar.
Oqıǵa ornyna jedel járdem kelip jetken.
«Men qazirgi ýaqytta ne bolǵanyn, ıaǵnı ol avtobýstyń aýdarylǵanyn nemese jol shetine shyǵyp qalǵanyn naqty aıta almaımyn. Rastaıtyn aqparat kútip otyrmyz. Biraq, «112» nómiri arqyly oqıǵa ornyna jedel medıtsınalyq qyzmetkerlerdiń jetkeni belgili boldy. Onda qazir jol saqshylary, TJD qyzmetkerleri jumys atqaryp jatyr. Birneshe adam aýrýhanaǵa jetkizilgen. Biraq, aýyr jaraqat alǵandar týraly aqparat kelip túsken joq. Oqıǵa shamamen 1 jarym saǵat buryn oryn alǵan», - deıdi Sklıar.
Onyń aıtýynsha, avtobýsta shamamen 15 adam bolǵan. Jolaýshylardyń keıbiri kólik toqtatyp ary qaraı saparyn jalǵastyrýda.
Al jergilikti yk-news.kz saıtynyń habarlaýynsha jolaýshylar avtobýsy aýdarylyp qalǵan.
«Qazavtojol» mekemesi jol-kólik oqıǵasy oryn alǵan ýchastokta júrýge shekteý qoıyp otyr.
