ShQO-da jol qyzmetteriniń 127 basshysy sapasyz jol úshin jazaǵa tartyldy
ÓSKEMEN. QazAqparat – Shyǵys Qazaqstan oblysynyń tártip saqshylary 890-nan astam kóshe men kólik joldaryna tekserý júrgizip, zańbuzýshylyq jasaǵan jol qyzmetteriniń 127 basshysyn ákimshilik jaýapkershilikke tartty, dep habarlaıdy QazAqparat tilshisi.
Polıtsııa departamenti jergilikti atqarýshy organdarmen birlesip, jol jáne kólik ınfraqurylymyn jaqsartýǵa erekshe kóńil bólýde.
«Óńir boıynsha 13 jańa baǵdarsham ornatylýda. Buden bólek, Óskemen qalasyndaǵy 6 baǵdarshamǵa «+» belgisi bar qosymsha sektsııa qoıylmaq», - deıdi ShQO PD bastyǵy Saǵat Madıev.
Rettelmegen jaıaý júrginshiler ótkeliniń aldyndaǵy qaýipti ýchaskelerde 450 metrlik dybystyq jolaqtar jasalyp, 60 jaryqdıodty belgiler ornatyldy. Sondaı-aq 111 jasandy jol kedergileri jańartylyp, 33 000 sharshy metr jol tańbasy salyndy.
Respýblıkalyq mańyzy bar avtokólik joldaryn (Almaty-Óskemen, Omby-Maıqapshaǵaı, Taskesken-Baqty) rekonstrýktsııalaý boıynsha iri jobalar júzege asyrylyp jatyr.
Statıstıkaǵa súıensek, 2020 jyldyń basynan beri oblysta 417 jol-kólik oqıǵasy tirkelgen. Sonyń saldarynan 50 adam kóz jumyp, 603 adam ártúrli dárejedegi dene jaraqat aldy.
Jol apatynyń kóbi jol erejesin óreskel buzatyn júrgizýshilerdiń kinásinen oryn alýda.
