ShQO-da jol erejesin buzyp, aıyppul tólemeı júrgen 40 júrgizýshi jaıaý qaldy
ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri «Aıyppul tóle» jedel aldyn alý sharasyn júrgizdi, dep habarlaıdy QazAqparat tilshisi.
ShQO p olıtsııa departamenti baspasóz qyzmetiniń málimetine súıensek, «Aıyppul tóle» jedel aldyn alý sharasy 1-7 qyrkúıek aralyǵynda ótken.
Jeti kún ishinde memleket bıýdjetine 10 mln teńgeden astam qarajat óndirilip, ákimshilik quqyqbuzýshylyq týraly qaýlyny oryndamaǵan 40 adamnyń kóligi aıyp turaǵyna qoıyldy.
Sonymen qatar 2000-nan astam júrgizýshige bereshegin tóleý qajettigi týraly eskertý jasaldy.
«Máselen, 7 qyrkúıek kúni tártip saqshylary Óskemende 28 jastaǵy turǵynnyń basqarýyndaǵy «Subaru» markaly kólikti toqtatty. Tekserý kezinde onyń «Sergek» kameralaryna tirkelgen 19 tólenbegen aıyppuly bar ekendigi anyqtaldy. Qaryzdyń jalpy somasy – 320 870 teńge. Barlyq buzýshylyqtar QR ÁQBtK-niń 592-baby (Jyldamdyqty ruqsat etilgen shekten asyrý) boıynsha jasalǵan. Boryshkerdiń kóligi aıyppuldardy tolyq ótegenge deıin mamandandyrylǵan turaqqa jetkizildi», - dedi ShQO PD ákimshilik polıtsııa basqarmasynyń bastyǵy Ernar Bazarov.
