ShQO-da jol erejesin buzǵan júrgizýshiler 116 mln teńgeniń aıyppulyn tólemeı júr
ShQO Polıtsııa departamentiniń málimetine súıensek, tártip saqshylary jol erejesin buzyp, aıyppuldy tólemegen júrgizýshilerdi anyqtady.
«Polıtseıler «Qorǵaý» mobıldi qosymshasynyń kómegimen jáne prokýratýra ókilderiniń, jeke sot oryndaýshylarynyń qatysýymen «Boryshker» jedel aldyn alý sharasyn ótkizdi. Sonyń barysynda boryshkerler men jol júrisi qaǵıdalaryn qasaqana buzýshylar izdestirildi. Sharanyń jeti kúninde 1981 ákimshilik is boıynsha 25,9 mln teńge óndirildi. Sonymen qatar tólenbegen aıyppuldar úshin mamandandyrylǵan avtoturaqtarǵa 51 kólik qoıyldy», - delingen aqparatta.
Jyl basynan beri Shyǵys Qazaqstan oblysynyń polıtsııa qyzmetkerleri 96 myńnan astam quqyq buzýshylyqty tirkedi. Onyń ishinde búgingi kúnge deıin 116 mln teńgeden astam somaǵa 17 myń qaýly óndirilmegen kúıinde qalyp otyr.
Eske salsaq, keshe Óskemende esirtki qabyldap kólik tizgindegen zeınetker ustalǵanyn habarlaǵan edik.
