ShQO-da jol erejesin buzǵan 40 adamnyń kóligi aıyppul turaǵyna qoıyldy
ÓSKEMEN. QazAqparat – Shyǵys Qazaqstan oblysynda jol erejesin buzǵan 40 adamnyń kóligi aıyppul turaǵyna qoıyldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, tártip saqshylary «Boryshker» jedel aldyn alý sharasynyń birinshi kúninde 11 mln teńgeden astam aıyppul óndirdi. Sondaı-aq bereshegi bar 40 júrgizýshiniń kóligi aıyppul turaǵyna jetkizilgen.
«Máselen, polıtsııa qyzmetkerleri Lexus avtokóligin tizgindep kele jatqan Óskemen qalasynyń 45 jastaǵy turǵynyn toqtatty. Belgili bolǵandaı, onyń «Sergek» apparattyq-baǵdarlamalyq keshen kameralaryna 20 ret jol erejesin buzǵany tirkelgen. Alaıda er adam birde bir aıyppuldy tólemegen. Júrgizýshiniń jalpy qaryzy – 293 450 teńge», - delingen aqparatta.
Qala turǵynynyń kóligi aıyppuldar tolyqtaı ótelgenshe mamandandyrylǵan turaqqa qoıyldy.
