ShQO-da jol boıyndaǵy taýda 5 jarylys jasalyp, 74 500 tekshe metr qar túsirildi

ÓSKEMEN. QazAqparat – Shyǵys Qazaqstan oblysynda jol boıyndaǵy taýda 5 jarylys jasalyp, 74 500 tekshe metr qar túsirildi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, óńir aýmaǵynda bir aptaǵa jýyq ýaqyt boıy qar tolassyz jaýdy. Osydan soń qar kóshkini júrý qaýpi týyndaǵan.

«Qazseldenqorǵaý» ShQ fılıalynyń mamandary júrgizgen monıtorıng barysynda ásirese «Óskemen-Samar» tasjolynda kóshkin júrý qaýpi joǵary ekendigi belgili boldy. Soǵan oraı atalǵan tasjoldyń 95-102 shaqyrymynda profılaktıkalyq maqsatta kóshkin túsirý týraly sheshim qabyldandy. Barlyǵy 5 ret jarylys jasalyp, 74 500 tekshe metr qar túsirildi», - delingen aqparatta.

Oblysta kóshkin júrý qaýpi áli de bar. Sondyqtan qutqarýshylar óńir jurtshylyǵyna taýly jerlerge barmaý qajettigin eskertedi.