ShQO-da jol apatynan áıel kóz jumyp, eki balasy aýrýhanaǵa jetkizildi
ÓSKEMEN. QazAqparat – Shyǵys Qazaqstan oblysynyń Úrjar aýdanynda áıel júrgizýshi jol apatynan qaza bolyp, onyń eki balasy aýrýhanaǵa tústi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «Maqanshy-Jalańashkól» tasjolymen kele jatqan Daewoo Nexia avtokóliginiń júrgizýshisi rýlge ıe bola almaı, kólik jyraǵa qulap ketken. Saldarynan 45 jastaǵy júrgizýshi áıel sol jerde mert boldy. Onyń 7 jáne 12 jastaǵy eki balasy men 62 jastaǵy jolaýshy aýrýhanaǵa jetkizildi. Dárigerler tekserip bolǵan soń olar úılerine jiberildi.
«Atalǵan fakti boıynsha QR Qylmystyq kodeksiniń 345-baby, 3-bóligi boıynsha sotqa deıingi tergeý amaldary júrgizilýde. Birqatar sot-medıtsınalyq saraptama taǵaıyndalǵan. Sonyń nátıjeleri boıynsha protsedýralyq sheshim qabyldanady», - dedi ShQO DP bastyǵy Saǵat Mádıev.
