ShQO-da jol apatynan 6 adam zardap shekti
ÓSKEMEN. QazAqparat – Shyǵys Qazaqstan oblysynda jeńil kólik pen KamAZ soqtyǵysyp, 6 adam, onyń ishinde 2 bala zardap shekti, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, «Omby-Maıqapshaǵaı-Tasbastaý-Aqjar» tasjolynyń 33-shaqyrymynda LADA avtokóliginiń júrgizýshisi aýa raıynyń qolaısyzdyǵyn eskermeı qarsy baǵytqa shyǵyp, KamAZ kóligimen soqtyǵysqan.
«Jol-kólik oqıǵasy saldarynan LADA avtokóliginiń 28 jastaǵy júrgizýshisi men bes jolaýshy zardap shekti. Onyń ekeýi 2 jáne 5 jastaǵy balalar. Barlyǵy Zaısan aýdandyq ortalyq aýrýhanaǵa jetkizildi», - delingen habarlamada.
Atalǵan fakti boıynsha sot-medıtsınalyq saraptama taǵaıyndaldy. Sonyń nátıjeleri boıynsha protsessýaldyq sheshim qabyldanady.
