ShQO-da jol apatynan 2 adam kóz jumdy
ÓSKEMEN. QazAqparat – Shyǵys Qazaqstan oblysyndaǵy «Óskemen-Semeı» tasjolynda eki kólik soqtyǵysyp, 2 adam qaza boldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, jol-kólik oqıǵasy keshe saǵat 18.00 shamasynda bolǵan. «Óskemen-Semeı» tasjolynyń 127-shaqyrymynda Lada jáne Chevrolet kólikteri soqtyǵysty.
«Jol apatynyń saldarynan 36 jastaǵy Chevrolet júrgizýshisi men 45 jastaǵy Lada kóliginiń jolaýshysy dárigerler kelip jetkenshe sol jerde kóz jumdy. Qazirgi ýaqytta departamenttiń tergeý-jedel toby oqıǵanyń mán-jaıyn anyqtap jatyr», - dep habarlady vedomstvo ókilderi.
Atalǵan fakti boıynsha QR Qylmystyq Kodeksiniń 345-babyna sáıkes (abaısyzda eki nemese odan da kóp adamnyń ólimine ákep soqtyrǵan jol qozǵalysy erejelerin buzý) sotqa deıingi tergeý amaldary júrgizilýde. ⠀
