ShQO-da jol apatynan 1 adam kóz jumyp, 4 adam jaraqat aldy
ÓSKEMEN. QazAqparat – Shyǵys Qazaqstan oblysynda jol-kólik oqıǵasynan 1 adam kóz jumyp, 4 adam jaraqat aldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 22 qańtarda saǵat 09:00 shamasynda Borodýlıha aýdanyndaǵy «Semeı-Reseı Federatsııasynyń shekarasy» tasjolynyń 25 shaqyrymynda jol-kólik oqıǵasy tirkeldi.
«72 jastaǵy «Honda accord» avtokóliginiń júrgizýshisi Novopokrovka aýylynan Semeıge qaraı bara jatyp, aldyndaǵy kólikterdi ozý úshin qarsy jolaqqa shyqqan. Sol kezde ol «ÝAZ» kóligimen betpe-bet soqtyǵysty», - dep habarlady vedomstvo ókilderi.
Sonyń saldarynan 72 jastaǵy júrgizýshi birden sol jerde qaıtys boldy. Al ÝAZ avtokóliginiń 25 jastaǵy júrgizýshisi jáne onyń úsh jolaýshy ( 36 jastaǵy áıel, 40 jáne 24 jastaǵy er adamdar) túrli dárejedegi dene jaraqattaryn aldy.
Atalǵan fakti boıynsha QR Qylmystyq Kodeksiniń 345-baby 3-bóligimen sotqa deıingi tergeý amaldary júrgizilýde.
