ShQO-da jol apatyna túsip, kólikke qystyrylyp qalǵan áıel qutqaryldy
ÓSKEMEN. QazAqparat – Shyǵys Qazaqstan oblysynda kóligin basqara almaı qalǵan áıel janarmaı quıý stantsııasyna soǵyldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Úrjar aýdanynda qutqarýshylar jol-kólik oqıǵasyna tap bolǵan azamatqa kómek kórsetti.
Úrjar aýylyna kireberis jolda «Mitsubishi Galant» avtokóliginiń júrgizýshisi rýldi basqara almaı qalyp, janarmaı quıý stantsııasynyń baǵanyna soǵylǵan. Jol apaty saldarynan áıel adam ishinde qystyrylyp qalǵan.
«Oqıǵa ornyna №17 órt sóndirý bóliminiń qyzmetkerleri shuǵyl jetti. Olar «Holmatro» qurylǵysy arqyly kóliktiń qysylǵan jerin ashyp, jaraqat alǵan adamdy alyp shyqty. Qazirgi ýaqytta áıel jedel járdem qyzmetkerlerine tapsyryldy», - delingen aqparatta.
Esterińizge sala ketsek, osyǵan deıin Óskemende páterde toqqa qosylǵan smartfonnan órt shyǵyp, turǵyndar evakýatsııalanǵanyn habarlaǵan edik.
