ShQO-da jol apattarynan bıyl 86 adam kóz jumdy
ÓSKEMEN. QazAqparat – Shyǵys Qazaqstan oblysynda jyl basynan beri jol apattarynan 86 adam qaza boldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, óńir boıynsha bıyl 580 jol-kólik oqıǵasy tirkelken. Sonyń saldarynan 86 adam qaza bolyp, 792 adam túrli jaraqat aldy.
Kóp jaǵdaıda oqys oqıǵanyń sebebi – jol qozǵalysy erejelerin óreskel buzýdan bolyp jatady. Osy rette, tártip saqshylary jergilikti atqarýshy organdarmen birlesip, jol-kólik ınfraqurylymyn jaqsartý jáne jol qozǵalysyn uıymdastyrý deńgeıin arttyrý máselelerine erekshe kóńil bólýde.
«Ásirese kósheler men tasjoldarǵa tekserý júrgizýge, anyqtalǵan kemshilikterdi joıýǵa uıǵarym berýge asa mańyz aýdarylǵan. Byltyr departament ókilderi 4 000-nan astam tekserý júrgizdi. Sonyń nátıjeleri boıynsha buzýshylyqtarǵa jol bergen 225 jol qyzmetiniń basshylary ákimshilik jaýapkershilikke tartylǵan. Sondaı-aq rettelmeıtin jaıaý júrginshiler ótkelderine 74 jaryqdıodty belgiler ornatyldy», - dedi oblystyq PD bastyǵy Saǵat Mádıev.
Onyń aıtýynsha, bıyl respýblıkalyq mańyzy bar tasjoldardy (Almaty-Óskemen, Omby-Maıqapshaǵaı) jáne eldi mekenderdiń kóshe joldaryn rekonstrýktsııalaý boıynsha birqatar jobalar iske asyrylýda.
