ShQO-da jol apaty bolyp, jolaýshy qaza tapty
ASTANA. KAZINFORM – Shyǵys Qazaqstandaǵy Óskemen-Rahman qaınary tas jolynda úsh kólik soqtyǵysyp, bir adam qaza tapty. Oqıǵa ornynan túsirilgen vıdeo áleýmettik jelilerde paıda boldy. Osydan keıin osy oqıǵaǵa patrýldik kóliktiń qatysy bolýy múmkin degen boljam aıtylyp jatyr.
Apat 18 qyrkúıekte saǵat 18:30 shamasynda tas joldyń 48-shi shaqyrymynda boldy. Toyota, Chevrolet jáne Subaru kólikteri bir-birimen soqtyǵysqan.
Apat saldarynan Toyota kóligindegi jolaýshy oqıǵa ornynda qaıtys boldy. Basqalary aýrýhanalarǵa jetkizildi.
Áleýmettik jelilerde oqıǵa ornynan vıdeo jarııalandy. Kadrda apatqa ushyraǵan kólikter men jaqyn mańdaǵy polıtsııa qyzmetkerleri kórsetilgen. Vıdeo avtory patrýldik kólik basyp ozýǵa tyrysyp, soqtyǵysýǵa sebep bolýy múmkin dep boljady.
Shyǵys Qazaqstan oblysynyń Polıtsııa departamenti beınejazbaǵa túsirilgen qyzmetkerlerdiń apatqa qatysy joq ekenin málimdedi.
– Beınejazbaǵa túsirilgen polıtsııa qyzmetkerleri jol qozǵalysy erejelerin saqtaı otyryp, apatty kórip, jaraqat alǵandarǵa kómek kórsetý úshin toqtady, - dep habarlady departament.
Resmı nusqa boıynsha, patrýldik kólik soqtyǵysýǵa sebep bolmaǵan. Biraq oqıǵa bastalǵannan keıin kelgen. Departament sonymen qatar jaraqat alǵan polıtsııa qyzmetkerleri týraly aqparatty rastamady.
Apatqa baılanysty qylmystyq is qozǵaldy. Qazir barlyq mán-jaı anyqtalyp jatyr.
Polıtsııa Qylmystyq is júrgizý kodeksiniń 201-babyna sáıkes tergeý múddesi úshin basqa aqparatty jarııa etýge bolmaıtynyn atap ótti.
Departament azamattardy resmı derekkózderden alynǵan aqparatqa súıenýge shaqyrdy. Sonymen qatar jalǵan nemese jańylystyratyn aqparat taratqany úshin jaza qoldanylatynyn eske saldy.
Pavlodarda jol apatynan bir adam mert bolyp, taǵy jeteýi jaraqat alǵanyn jazǵan edik.
