ShQO-da joǵalyp ketken eki bala tabyldy
ÓSKEMEN. QazAqparat – Shyǵys Qazaqstan oblysynyń polıtseıleri bir saǵattyń ishinde joǵalǵan balalardy tapty, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 16 naýryzda saǵat 15:39-da Altaı aýdany polıtsııa bóliminiń «102» jedel arnasyna eki balanyń joǵalǵany týraly habar túsken.
«Áıel adam saǵat 12:00-de mektepten shyqqan segiz jastaǵy ulynyń úıge oralmaǵanyn, qazir qaıda júrgeni belgisiz ekendigin aıtty. Budan bólek, taǵy bir áıel 12.00 shamasynda úıden sabaqqa shyqqan 10 jastaǵy ulynyń mektepke kelmegendigi týraly jetkizgen. Atalǵan fakti boıynsha jedel izdestirý sharalary júrgizildi. Altaı aýdandyq polıtsııa bóliminiń jeke quramy dabyl boıynsha kóterilip, joǵalǵan balalardy izdeýge baǵyttalǵan. Jertóleler, shatyrlar, káriz lıýkteri, qaraýsyz qalǵan ǵımarattar túgel tekserildi», - delingen habarlamada.
Sonyń nátıjesinde, bir saǵat ishinde balalar úıden 5 shaqyrym jerdegi Vtorýshka ózeniniń mańynan tabyldy. Ózenge baryp oınaǵan olar jolda adasyp ketken.
Qazirgi ýaqytta tártip saqshylary balalardy ata-analaryna tapsyrdy.
