ShQO-da joǵalyp ketken 16 jastaǵy qyz tabyldy
ÓSKEMEN. QazAqparat – Shyǵys Qazaqstan oblysy Glýbokoe aýdanynda joǵalyp ketken jasóspirim tabyldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, krımınaldyq polıtsııa basqarmasynyń qyzmetkerleri ınternet-resýrstaryna monıtorıng júrgizý barysynda kámelettik jasqa tolmaǵan qyzdyń joǵalyp ketkendigi jaıly aqparatty kórgen. Úıden shyǵyp ketken jasóspirim sol kúıi qaıtyp oralmapty. Al ata-anasy polıtsııaǵa habarlaspaı, áleýmettik jeli arqyly izdeý salǵan.
«Oqıǵa ornyna birden jedel-tergeý toby attanyp, barlyq polıtseıler joǵalǵan qyzdy izdeýge kiristi. Jasóspirimniń barýy múmkin jerleri, aýdanǵa jaqyn ornalasqan eldi mekender túgel tekserildi. Bir táýlik ishinde qyz aman-esen tabyldy. Belgili bolǵandaı, ol dostarymen birge júrgen», - dep habarlady vedomstvo ókilderi.
16 jastaǵy qyzdyń densaýlyǵyna eshqandaı zııan kelmegen. Qazir jasóspirim ata-anasyna qaıtaryldy.
