Sý tasqyny: BQO-da 375 otbasyǵa 69 mln teńge áleýmettik kómek kórsetildi
ORAL. KAZINFORM — Batys Qazaqstan oblysynda Bórli, Qaratóbe, Syrym, Terekti, Tasqala aýdandary men Oral qalasynda sý tasqynynan zardap shekken turǵyndarǵa áleýmettik kómek kórsetilip jatyr.
BQO jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Dildásh Isqaqovanyń aıtýynsha, sý tasqynynan 1 171 otbasy, 4 168 adam (sonyń 1 252-si – balalar, 405-i – zeınetker, 78-i – múgedektigi bar adamdar, 87-si – kópbalaly otbasylar) zardap shekken.
«Qazirgi tańda 375 otbasyna 69,2 mln teńge, olardyń árqaısysyna 50 AEK (184 600 teńge) mólsherinde birjolǵy áleýmettik kómek kórsetildi. Bul tólemder jalǵastyrylýda. Zardap shekkenderden ótinishter qabyldanyp, aktiler jasalýda. Turǵyn úıleri sý tasqynynan zardap shekken 25 otbasyna ataýly áleýmettik kómek taǵaıyndaldy. Sý tasqynynan zardap shekken 78 múgedek adamnyń ishinde tehnıkalyq kómekshi ornyn toltyrýshy quraldarynan aıyrylǵandary bar. Kúni búgin demeýshilerdiń kómegimen 7 adam jórgekpen, bireýi nesıe qabyldaǵyshpen, bireýi jaıalyqtarmen, úsheýi ýaqytsha kreslo-arbalarmen qamtamasyz etildi», - dedi D.Isqaqova.
Brıfıngide sondaı-aq BQO qarjy basqarmasy basshysynyń orynbasary Medet Aıdynǵalıev tabıǵı sıpattaǵy TJ saldarynan zardap shekkenderge keltirilgen zııandy óteý tártibin túsindirip berdi.
«Sý tasqyny basylysymen qala men aýdandarda qurylǵan komıssııalar úı-úıdi aralap, naqty jaǵdaıdyń qandaı ekendigin baǵamdaıdy. Baspana jaramsyz dep tanyla ma, álde jóndeýge jata ma, qansha mal-múlki sýǵa ketti, sonyń bári qaralady. Ákimdikter turǵyndardyń ótinishi tirkelgen kúnnen bastap 10 jumys kúni ishinde baǵalaýshyny tarta otyryp, keltirilgen nuqsannyń mólsherin baǵalaýdy uıymdastyrady. Zalal mólsheri anyqtalǵannan keıin qarajat bólý týraly sheshim qabyldanady», - dedi M.Aıdynǵalıev.
Eske sala keteıik, budan buryn Batys Qazaqstan oblysynda 1 591 mal ólýine baılanysty shyǵynnyń qalaı óteletinin jazǵan bolatynbyz. Sondaı-aq Oral qalasynda zardap shekken turǵyndardan ótinish qabyldaý bastaldy.
Batys Qazaqstanda 7 myńdaı adam evakýatsııalandy.
