ShQO-da joǵalǵan stýdent úsh kúnnen beri tabylmaı jatyr
ÓSKEMEN. QazAqparat - Óskemen qalasynda 17 jastaǵy stýdent úsh kúnnen beri tabylmaı jatyr, dep habarlaıdy QazAqparat tilshisi.
Erzat Ǵazezov 9 maýsym kúni ata-anasymen qaladaǵy ashanalardyń birinde tústengen. Sodan keıin ol habarsyz ketken. Alǵashynda stýdenttiń jaqyndary ony óz kúshterimen izdep tabýǵa tyrysqan eken.
«Biz polıtsııaǵa habarlasqanda 3 táýliktiń ishinde tabylmasa, izdeýge kirisetinderin aıtty. Búgin aryz jazdyq. Olar qala ishinde izdeý jumystaryn qolǵa alyp, oblystyń barlyq aýdandaryna habar jiberetinderin málim etti. Erikti toptar da iske aralasyp jatyr. «Kórdim, bildim» degen bir adam bolsashy» - deıdi Erzattyń ápkesi.
Perızat Kasebaeva inisiniń D.Serikbaev atyndaǵy tehnıkalyq ýnıversıtettiń kolledjinde qurylysshy mamandyǵy boıynsha bilim alyp júrgenin aıtady. Áke-sheshesi Ulan aýdanyna qarasty Alǵabas aýylynda turatyndyqtan, Erzat Óskemende týysqandarynyń úıinde turyp kelgen. Ápkesiniń aıtýynsha, ol buǵan deıin habarsyz ketip kórmegen.
«Eshqandaı ersi qylyǵy joq bolatyn. Joǵalǵanyn habarlaǵanymyzda bári aqyl-esiniń saýlyǵyn surady. Júıkesinde eshqandaı kinárat joq. Nege ekeni belgisiz, telefonyn úıge qaldyryp ketipti. Odan eshbir mańyzdy aqparat tappadyq. Dostary onyń birneshe ret Semeıge baryp-kelgenin aıtady. Onysyn biz bilmegenbiz. Ýaqyt ótken saıyn ne oılaý kerektigin de bilmeıdi ekensiń» - deıdi Perızat Kasebaeva.
Erzat Ǵazezov joǵalǵan kúni ústine qara djınsy men jeńsiz jeıde, qara krossovka kıip júrgen. Qolynda qara kúrtesi bolǵan. Negizgi belgileri: boıy - 160 sm, oń aıaǵynan syltyp basady.
Týystary Erzatty kórgen, bilgen adam bolsa, 8-777-790-84-34 telefonyna habarlasýdy suraıdy.
