ShQO-da joǵalǵan adamnyń denesi ózennen tabyldy
ÓSKEMEN. QazAqparat - 1 sáýir kúni joǵalǵan 56 jastaǵy úrjarlyq baqtashynyń denesi Qarakól ózeninen tabyldy, dep habarlaıdy QazAqparat tilshisi.
Baqtashynyń joǵalǵany týraly týysqandary dabyl qaqqan. Jergilikti ishki ister qyzmetkerleri men qutqarýshylardyń birneshe kúngi jumys nátıje bermegen soń, marqumnyń jaqyndary Óskemennen arnaıy izdeý tobyn jiberý týraly ótinish jazǵan bolatyn. Óskemendik súńgýirler joǵalǵan adamdy izdep, 10 sáýir kúni keshke qaraı tapty.
«Boljam boıynsha, marqum atpen Qarakól ózenin kesip ótpek bolǵan. Aǵyny qatty ózen malshyny astyndaǵy atymen qosa aǵyzyp áketken. At jaǵaǵa aman shyqqanmen, qalyń kıingen marqumnyń maltaýǵa ıkemi kelmeı sýǵa ketken» - deıdi oblystyq tótenshe jaǵdaılar departamentiniń baspasóz qyzmetiniń basshysy Anastasııa Sklıar.
Malshynyń denesi at qulaǵan tustan 1,5 shaqyrym jerden tabyldy. Tótenshe jaǵdaı mamandary kóktemde kishigirim ózenderdiń ózi qaýipti kúshken aınalatynyn eskertedi.
«Kóktem kezinde deńgeıi 15 santımetrge jetken aǵystardyń ózi adamdy aǵyzyp áketedi. Al ózen deńgeıi jarty metrge jetse, kólikti de jańqa qurly kórmeıdi. Sondyqtan, shaǵyn ózenderdiń ózin qaýipsiz jerinen aınalyp ótý kerek» - deıdi tótenshe jaǵdaı mamandary.
Aıta keteıik, jyl basynan beri ShQO-da 2 adam sýǵa ketken. 
