ShQO-da joǵalǵan 6 jasar bala úılerdiń aýlasynan tabyldy
ÓSKEMEN. QazAqparat – Óskemen qalasynda Ulttyq ulan sarbazdary joǵalǵan balany eki saǵat ishinde taýyp, ata-anasyna jetkizdi, dep habarlaıdy QazAqparat tilshisi.
Jeksenbi kúni, keshki saǵat toǵyz shamasynda qala turǵyny qoǵamdyq tártipti kúzetip júrgen 5518 áskerı bólim sarbazdaryna 6 jasar balasyn taýyp berýin suraǵan. Áıeldiń aıtýynsha, balasy Qabanbaı batyr kóshesindegi aýlada oınap júrgen jerinen joǵalyp ketken.
«Mundaı kezde salǵyrttyq tanytýǵa bolmaıdy. Cebebi munyń arty orny tolmas qaıǵymen aıaqtalýy múmkin. Sondyqtan, búldirshindi qalaıda tez arada tabýǵa tyrystyq», – deıdi áskerı jasaq bastyǵy Farhat Sarshınov.
Eki saǵatqa sozylǵan izdeý jumystary barysynda áskerı jasaq Lev Tolstoı kóshesindegi aýlalardyń birinde túr-sıpaty sáıkes keletin balaqaıdy baıqap qalady. Aty-jóni men mekenjaıyn surastyrǵannan keıin onyń joǵalǵan bala ekeni anyqtalyp, ata-anasyna qaıtaryldy.
