ShQO-da joǵalǵan 2 búldirshin qyz aman tabyldy
ÓSKEMEN. QazAqparat – Shyǵys Qazaqstan oblysy Altaı qalasynda joǵalǵan 7 jáne 6 jastaǵy eki qyz bala aman tabyldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, zeınetker eki nemeresin ertip aýlaǵa shyqqan. Kenet 7 jáne 6 jastaǵy qyzdardy qart kisi kózinen tasa qaldyrǵan. Óz betimen qansha izdese de taba almaǵan ol polıtsııa qyzmetkerlerinen kómek suraǵan.
«Jedel-izdestirý sharalaryn júrgizgen tártip saqshylary balalardy kórshi aýlalardyń birinen tapty. Olar ájelerine eskertpesten oıyn qyzyǵyna berilip, basqa balalarmen ketip qalǵan. Qart kisi ózin jaısyz sezine bastaǵandyqtan sol jerge jedel járdem shaqyrtyldy. Qazirgi ýaqytta zeınetkerdiń jaǵdaıy jaqsy», - dep habarlady vedomstvo ókilderi.
Osy rette, polıtseıler óńir jurtshylyǵyna balalaryn qaraýsyz qaldyrmaý qajettigin eskertedi.
Esterińizge sala ketsek, osyǵan deıin Semeıde byltyr joǵalǵan er adamnyń denesi tabylǵanyn habarlaǵan edik.
