ShQO-da jylý jelilerin jóndeýge 2,5 mlrd teńgeden astam qarjy bólindi

ASTANA. KAZINFORM – Shyǵys Qazaqstan oblysyndaǵy jylý jelilerin jylytý maýsymyna daıyndaýǵa Úkimet rezervinen 2,5 mlrd teńgeden astam qarjy bólindi.

QR Prezıdenti Qasym-Jomart Toqaevtyń tapsyrmalaryn júzege asyrý aıasynda Úkimet rezervinen Shyǵys Qazaqstan oblysyndaǵy jylý jelilerin jóndeý-qalpyna keltirý jumystaryn júrgizýge 2,5 mlrd teńgeden astam qarjy bólindi. Premer-mınıstr Oljas Bektenov tıisti qaýlyǵa qol qoıdy.

Qujatqa sáıkes qarajat Rıdder qalasy men Q. Qaısenov kentiniń jylý jelilerinde jóndeý jumystaryn aıaqtaýǵa baǵyttalady. Bólingen qarjynyń negizgi bóligin Rıdder qalasynyń jylý jelileriniń eń qatty tozǵan 5,9 km ýchaskesin kúrdeli jóndeýge jumsaý josparlanyp otyr.

Ulan aýdany Q. Qaısenov kentinde uzyndyǵy 9 km jylý jelilerin rekonstrýktsııalaýdyń ekinshi kezegin aıaqtaýǵa 113 mln teńge baǵyttaý josparlanǵan.

Jalpy Shyǵys Qazaqstan oblysynyń eldi mekenderinde jylý jelileri 30 jyldan astam ýaqyt boıy paıdalanylyp keledi. Osy kezeńde olarǵa kúrdeli rekonstrýktsııa jasalǵan joq. Tozý deńgeıi orta eseppen 55%-dan, al jekelegen eldi mekenderde 75%-dan asady.

Esterińizge sala keteıik, osy jyldyń mamyr aıynda QR Úkimetiniń rezervinen eki qazandyq agregatyn jóndeýge, №5 redýktsııalyq-salqyndatý qondyrǵysynyń tehnologııalyq úderisterin basqarýdyń avtomattandyrylǵan júıesin engizýge, sondaı-aq Rıdder qalasynyń JEO-nyń óz qajettilikterin qamtamasyz etetin elektrotehnıkalyq jabdyqtyń bir bóligin aýystyrýǵa shamamen 1,7 mlrd teńge bólindi.

Sońǵy eki jylda qalada jóndeý jumystary tótenshe jaǵdaıda jáne JEO-ny tezirek iske qosý jáne jylý jelilerin jóndeý qajettiliginde júrgizildi. Jedel áreket etýdiń arqasynda eki jyl ishinde tozý 82%-dan 66,8%-ǵa deıin tómendedi.

Buǵan deıin Úkimet Arqalyq qalasynyń jylý jelilerin rekonstrýktsııalaý men jańǵyrtýǵa qarajat bólgen.