ShQO-da jylytý maýsymynda órtten 20-dan astam adam kóz jumdy
ÓSKEMEN. KAZINFORM - Shyǵys Qazaqstan oblysynda 2025-2026 jylǵy jylytý maýsymynda órtten 21 adam qaza boldy.
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha jylytý maýsymy bastalǵaly beri turǵyn úılerde 287 órt tirkeldi. Bul ótken jylmen salystyrǵanda 11%-ǵa artyq.
– Órt saldarynan 21 adam kóz jumyp, 21 adam jaraqat aldy. Qaıǵyly jaǵdaılardyń basym bóligi órt qaýipsizdigi talaptarynyń qarapaıym erejeleriniń saqtalmaýyna baılanysty, - deıdi departament bastyǵy Rashıd Blıalov.
Qutqarýshylar úılerdegi órtterdiń jáne adamdardyń qaza bolýynyń aldyn alýǵa baǵyttalǵan profılaktıkalyq jumystardy da qolǵa alǵan.
– Departament qyzmetkerleri 91 000-nan astam úıdi aralap, qaýipsizdik sharalary, peshter men elektr jabdyqtaryn paıdalaný erejelerin túsindirdi. Áleýmettik osal sanattaǵy azamattar turatyn, peshpen jylytylatyn 2 763 úı baqylaýda tur. Olardy tekserý barysynda 700-den astam zańbuzýshylyq tirkeldi, - deıdi R.Blıalov.
Osy jylytý maýsymynda áleýmettik osal sanattaǵy azamattardyń úılerine ýly gazdy anyqtaıtyn 680 datchık ornatylǵan.
Jalpy sońǵy 6 jylda 17 myńnan astam osyndaı datchık ornatyldy. Olar 45 adamnyń ómirin ajaldan arashalap qaldy, onyń ishinde 31 bala bar.
Eske salsaq, osyǵan deıin Semeı turǵyny «órtten 18 adam qaza tapty» degen jalǵan aqparat taratqany úshin jazalanǵany habarlanǵan.
