ShQO-da jylytý maýsymy kezinde órtten 22 adam kóz jumdy
ASTANA. KAZINFORM — Shyǵys Qazaqstan oblysynda qarashadan sáýirge deıingi jylytý maýsymy kezinde turǵyn úı sektorynda 341 órt tirkeldi.
Ótken jylmen salystyrǵanda kórsetkish (349 oqıǵa) azdap tómendegenimen, saldary aýyr kúıinde qalyp otyr — 22 adam qaza taýyp, osynsha adam jaraqat aldy.
Jylytý maýsymy aıaqtalǵannan keıin de tilsiz jaý adam ómirin jalmady. Máselen, sáýirdiń 28-i kúni Glýbokovskıı aýdanyndaǵy Tarhanka aýylynda adam turmaıtyn jeke úıden órt shyqty.
— Órtti sóndirý kezinde úı ishinen 1961 jyly týǵan er adamnyń máıiti tabyldy, — dep habarlady ShQO Tótenshe jaǵdaılar departamentiniń baspasóz qyzmeti.
Mamandar órttiń negizgi sebebi retinde adamnyń qatelikterin alǵa tartty.
— Órttiń 70%-ǵa jýyǵy turǵyndardyń ózderinen bolady. Kóbine órt peshter men elektr jabdyqtaryn durys paıdalanbaý saldarynan tutanady. Maýsym ishinde peshti jylytýǵa baılanysty 140 órt oqıǵasy tirkelse, 82-si elektr quraldaryn durys paıdalanbaý saldarynan bolǵan, — dep habarlady ShQO Memlekettik órtke qarsy baqylaý departamenti.
Sonymen qatar, turǵyn úı sektory azamattyq qorǵanys organdarynyń tikeleı baqylaýynda bolmasa da, profılaktıkalyq jumystar oblys kóleminde júıeli túrde júrgizilip otyr.
Jylytý kezeńinde qutqarýshylar 92 myńnan astam úıdi aralap, 330-dan astam kezdesý ótkizip, 12 myńnan asa adamǵa qaýipsizdik boıynsha túsindirý jumystaryn júrgizgen.
Áleýmettik turǵydan osal toptarǵa erekshe kóńil bólinedi. Peshpen jylytylatyn 2763 úı baqylaýda bolǵan.
— Tekserý barysynda 700-den astam zańbuzýshylyq anyqtaldy. Negizinen peshter men elektr jelilerin durys paıdalanbaý faktileri. Qatar júrgizilgen jumystar nátıjesinde pesh jabdyqtary jóndelip, elektr symdary qalpyna keltirilip, datchıkter ornatyldy, — dep atap ótti vedomstvo.
Osyndaı úılerge 680 kómirtek totyǵyn anyqtaıtyn datchık ornatylǵan. Tek osy maýsymnyń ózinde olar eki adamnyń ómirin saqtap qalǵan. Jalpy, sońǵy 6 jylda óńirde shamamen 17 myń datchık ornatylyp, sonyń arqasynda 45 adamnyń, onyń ishinde 31 balanyń ómiri saqtalǵan.
Tótenshe jaǵdaılar departamenti kelesi jylytý maýsymyna daıyndyqty qazirden bastaý qajet ekenin eskertedi — peshter men elektr jelileriniń jaǵdaıyn tekserip, qaıǵyly jaǵdaılardyń aldyn alý mańyzdy.
Eske salaıyq, Tótenshe jaǵdaılar mınıstrligi elimizdegi órt qaýipsizdigi erejelerin jańartady.
