ShQO-da jyl bastalǵaly 13 mas júrgizýshi ustaldy

ÓSKEMEN. KAZINFORM — Shyǵys Qazaqstan oblysynda 2026 jyldyń alǵashqy 5 kúninde mas kúıde kólik aıdaǵan 13 júrgizýshi ustaldy.

ShQO polıtsııa departamenti baspasóz qyzmetiniń málimetinshe, 1-5 qańtar aralyǵynda tártip saqshylary kúsheıtilgen rejımde jumys istedi. Áserese mereke kúnderi jol qozǵalysy qaýipsizdigin qamtamasyz etýge jáne quqyq buzýshylyqtardyń aldyn alýǵa erekshe kóńil bólindi.

Bes kún ishinde polıtseıler 1 725 ákimshilik quqyq buzýshylyqty anyqtady. 

— Kólikti mas kúıde basqarý faktileri azaımaı tur. Atalǵan kezeńde 13 mas júrgizýshi ustaldy. Tipti medıtsınalyq kýálandyrýdan bas tartqandar da boldy. Mundaı áreket mas kúıde bolý faktisin moıyndaýmen teń sanalady jáne qatań jazaǵa ákelip soǵady, — delingen aqparatta.

Máselen, túngi reıdterdiń birinde júrgizýshi ózin toqtatqan polıtseılerge «tek qonaqtardy shyǵaryp saldym» dep, kýálandyrýdan ótýden bas tartqan. Osylaısha, avtokólik tárkilenip, mamandandyrylǵan turaqqa qoıyldy, al júrgizýshi zań boıynsha jaýapqa tartyldy.

— Azamattardyń ómiri men densaýlyǵyna tónetin qaýiptiń aldyn alý maqsatynda 16 kólik arnaıy turaqtarǵa ornalastyryldy. Oǵan tehnıkalyq aqaýlardan bastap, qajetti qujattardyń bolmaýyna deıingi túrli jaǵdaılar sebep bolǵan, — delingen habarlamada.

Eske salsaq, osyǵan deıin Qazaqstan kıberpolıtsııasy 2025 jyly shetelde 7 call-ortalyqty joıǵany habarlanǵan.