ShQO-da jyl basynan beri jer úılerde 342 órt shyqty

ÓSKEMEN. KAZINFORM – Shyǵys Qazaqstan oblysynda osy jyldyń basynan beri barlyǵy 500-ge jýyq órt bolsa, onyń ishindegi 342-si jer úılerde shyqqan.

ShQO Tótenshe jaǵdaılar departamentiniń málimetine súıensek, qutqarýshylar úılerdi aralap, halyqqa jan-jaqty túsindirý jumystaryn júrgizip jatyr. 

«Búgingi kúnge deıin olar 52 myńnan astam úıdi aralap shyqty. Sonyń nátıjesinde, órt qaýipsizdigi talaptaryn buzýdyń 13 090 deregi tirkelip, sol jerde joıyldy. Jyl basynan beri oblys aýmaǵynda barlyǵy 492 órt shyqqan. Onyń 342-si jeke turǵyn úı sektorynda boldy. Bul barlyq órtterdiń 69%-yn quraıdy», - delingen aqparatta.

Óńir boıynsha áleýmettik osal sanattaǵy otbasylar turatyn 3 101 úı bar. Órt qaýipsizdigi aılyǵy aıasynda TJD qyzmetkerleri muqtaj jáne múmkindigi shekteýli azamattarǵa tútin murjalaryn tazalaý, pesh jabdyqtaryndaǵy jaryqtar men sańylaýlardy joıý, pesh aldyndaǵy qorǵanysh metall qańyltyrdy ornatý syndy kómekter kórsetti. 

Sondaı-aq osyndaı otbasylardyń úılerine ýly gazdy anyqtaıtyn datchıkter ornatylyp jatyr. Sońǵy jyldary ornatylǵan osy qurylǵylardyń arqasynda 42 adamnyń ómiri qutqaryldy.

Eske salsaq, osyǵan deıin Shyǵys Qazaqstan oblysynyń qutqarýshylary kúzgi balyq aýlaýdyń qaýpi jaıly eskertken bolatyn.