ShQO-da jyl basynan beri zańsyz aınalymnan 32 keliden astam esirtki tárkilendi
ÓSKEMEN. KAZINFORM — Shyǵys Qazaqstan oblysynda nashaqorlyqpen kúres maqsatynda osy jyldyń birinshi toqsanynda atqarylǵan jumys qorytyndylandy.
Oblystyq polıtsııa departamentiniń málimetine súıensek, 2026 jyldyń birinshi toqsanynda tártip saqshylary esirtki jáne psıhotroptyq zattardyń zańsyz aınalymyna baılanysty 54 qylmysty anyqtaǵan.
— Onyń ishinde 19 qylmystyq teris qylyq jáne 35 esirtki qylmysy tirkelgen. Atap aıtqanda, esirtki ótkizýdiń 30 deregi jáne esirtki ósimdikterin zańsyz ósirýdiń 1 faktisi anyqtalǵan. Sonymen qatar quramynda esirtki bar ósimdikterdi ósirýge arnalǵan fıtozerthana jáne sıntetıkalyq esirtki daıyndaıtyn zerthana joıyldy, — deıdi departamenttiń uıymdasqan qylmysqa qarsy kúres basqarmasynyń bastyǵy Abaı Baqtııarov.
Zańsyz aınalymnan 32 keliden astam esirtki zattary tárkilendi, onyń ishindegi 12 keliden astamy — marıhýana.
— Sıntetıkalyq esirtkilerdi tárkileý boıynsha oń dınamıka baıqalady. Ótken jyldyń osy kezeńinde 996 gramm tárkilense, bıyl bul kórsetkish 20 keliden asty. Nashaqorlyqtyń aldyn alý jumystaryna da erekshe kóńil bólinip keledi. Jyl basynan beri 35 myńǵa jýyq adamdy qamtyǵan 197 profılaktıkalyq is-shara ótkizildi, — deıdi A.Baqtııarov.
Óz sózinde ol 2026-2028 jyldarǵa arnalǵan nashaqorlyq pen esirtki bıznesine qarsy is-qımyl jónindegi keshendi jospar qurylǵanyn jetkizdi.
Eske salsaq, osyǵan deıin Taldyqorǵanda esirtki satý arnasy áshkerelengeni jaıly jazǵanbyz.
