ShQO-da jyl basynan beri órtten 11 adam qaza boldy
ÓSKEMEN. KAZINFORM – Shyǵys Qazaqstan oblysynda 2026 jyldyń basynan beri órtten 11 adam kóz jumdy.
ShQO tótenshe jaǵdaılar departamenti baspasóz qyzmetiniń málimetine súıensek, jyl basynan beri óńirde tirkelgen órtterdiń basym bóligi jeke turǵyn úı sektorynda bolǵan.
- Qyzyl jalyn shyǵýynyń negizgi sebepteri - elektr jabdyqtaryn jáne peshpen jylytý júıelerin paıdalaný kezinde qaýipsizdik talaptarynyń saqtalmaýy. Órt saldarynan 11 adam qaza boldy, onyń úsheýi - balalar. Qaıǵyly oqıǵalardyń barlyǵynda balalar eresekterdiń qaraýynsyz qalǵan, - delingen aqparatta.
Basqa óńirlerde bolǵan rezonansty oqıǵalar - Şýchınsk qalasyndaǵy dámhanada gaz-aýa qospasynyń jarylýy jáne Semeıdegi oıyn-saýyq ortalyǵyndaǵy órtke baılanysty Shyǵys Qazaqstanda adamdar kóp jınalatyn oryndardaǵy qaýipsizdik talaptary kúsheıtilip jatyr.
- Ásirese kópbalaly otbasylar, qarttar men áleýmettik osal toptar turatyn úılerge erekshe nazar aýdarylyp keledi. Energetıka jáne turǵyn úı-kommýnaldyq sharýashylyq basqarmasy turmystyq gaz ballondaryn jáne gaz jabdyqtaryn paıdalaný barysyn qatań baqylaýǵa aldy. Al bilim basqarmasy ata-analar arasynda balalardy qaraýsyz qaldyrmaý jóninde túsindirý jumystaryn kúsheıtip, mektepterde qaýipsizdik sabaqtary men evakýatsııalyq jattyǵýlar uıymdastyrady, - dep habarlady oblys ákimdiginen.
Sonymen qatar kásipkerler men adamdar kóp jınalatyn nysandardyń ıelerimen órt qaýipsizdigi talaptaryn qatań saqtaý jóninde túsindirý jumystary júrgizilmek. Bul ásirese Oraza aıt pen Naýryz meıramy qarsańynda ózekti bolyp otyr.
Eske salsaq, osyǵan deıin Óskemendegi óndiristik angar órtengeni habarlanǵan.