ShQO-da jyl basynan beri balyq aýlaý kezinde jeti adam sýǵa batty

ÓSKEMEN. KAZINFORM - Shyǵys Qazaqstan oblysynda 2026 jyldyń basynan beri sý aıdyndarynda balyq aýlaý kezinde jeti adam qaza boldy. Qutqarýshylar qaıǵyly oqıǵalardy saralap, balyqshylar ólimine sebep bolǵan negizgi faktorlardy atady.

ShQO-da jyl basynan beri balyq aýlaý kezinde jeti adam sýǵa batty
Foto: Atyraý oblysy TJD

Mamandardyń aıtýynsha, qaıǵyly jaǵdaılardyń basym bóligi balyqshylardyń qaıyqtan qulap ketýinen, sýǵa qutqarý keýdeshesin kımeı shyǵýynan jáne qolaısyz aýa raıy jaǵdaılaryn elemeýinen boldy. Sondaı-aq qarańǵy túskende balyq aýlaý men júzý quraldaryn shamadan tys júkteý de adam ómirine qaýip tóndiredi.

- Kúz mezgilinde oblystyń ózen-kólderinde balyq aýlaýshylardyń qatary kóbeıedi. Osyǵan baılanysty qutqarýshylar qaýipsizdik sharalaryn túsindirý jumystaryn kúsheıtti. Jyl basynan beri mamandar 300-den astam reıd ótkizip, balyqshylarǵa sýdaǵy qaýipsizdik erejelerin eskertip jatyr, - dep habarlady ShQO TJD.

Qutqarýshylar qaıyqtaǵy ár adamnyń mindetti túrde qutqarý keýdeshesin kııýi qajettigin eske saldy. Sonymen qatar sýǵa shyǵar aldynda júzý quralynyń jaramdylyǵyn tekserip, ózimen birge qutqarý sheńberi men qaıyqqa kirgen sýdy tógýge arnalǵan ydys alýǵa keńes berdi.

- Balyq aýlaýǵa attanbas buryn aýa raıy boljamyn tekserip, jaqyndaryna qaı jerde bolatynyn jáne qaı ýaqytta oralýdy josparlaǵanyn habarlaý qajet. Sý aıdynynda qarańǵy túskenshe qalmaǵan jón. Balyqshylardyń janynda dári qobdıshasy, jergilikti jerdiń kartasy, berik arqan, ysqyryq jáne sý ótkizbeıtin qaptaǵy uıaly telefon bolýy kerek. Eń bastysy, qutqarý keýdeshesi qaıyqta jaı ǵana jatpaı, adamnyń ústinde bolýy tıis, - delingen aqparatta.

Eske salsaq, osyǵan deıin Elordada órt sóndirýshiler 17 adamdy qutqarǵany habarlanǵan.