ShQO-da jyl basynan beri 400-ge jýyq stıhııalyq qoqys orny joıyldy
ASTANA. KAZINFORM — ShQO-da belgilenbegen jerge qoqys tastaýdyń 140 faktisi anyqtaldy, dep habarlaıdy QR Іshki ister mınıstrliginiń baspasóz qyzmeti.
Shyǵys Qazaqstan oblysynda «Taza Qazaqstan» respýblıkalyq aktsııasy aıasynda eldi mekender aýmaǵyn retke keltirý baǵytyndaǵy jumys jalǵasyp jatyr. Polıtsııa qyzmetkerleri turaqty negizde qoqys jınalǵan oryndardy anyqtap, olardy joıý boıynsha tıisti sharalar qabyldaıdy.
— Búginde oblys aýmaǵynda 442 stıhııalyq qoqys orny anyqtalyp, onyń 394-i joıyldy. Al jyl basynan beri polıtsııa qyzmetkerleri qaldyqtardy belgilenbegen jerlerge ornalastyrýdyń 140 faktisin anyqtady. Anyqtalǵan zań buzýshylyqtardy joıý úshin 388 usyný joldandy. Onyń 362-si boıynsha tıisti sharalar qabyldanyp, qurylys jáne turmystyq qaldyqtar arnaıy belgilengen oryndarǵa shyǵaryldy, — deıdi polıtsııa qyzmetkerleri.
ShQO polıtsııa departamenti abattandyrý talaptarynyń saqtalýyn baqylap, anyqtalǵan árbir zań buzýshylyq boıynsha tıisti sharalar qabyldaıdy.
— Tazalyq — ár adamnyń jaýapkershiliginen bastalady. Qoqysty belgilenbegen jerge tastamaý — qorshaǵan ortanyń tazalyǵy men óńirdegi tártipti saqtaýǵa qosylatyn qarapaıym ári mańyzdy úles, — dep úndedi tártip saqshylary.
Buǵan deıin Almaty oblysynda zańsyz qoqys úıindilerin anyqtaý úshin ǵaryshtyq monıtorıng júrgizilip jatqanyn jazdyq.
