ShQO-da jyl basynan beri 200-ge jýyq adam ınternettegi alaıaqtardyń quryǵyna túsken
ÓSKEMEN. KAZINFORM – Shyǵys Qazaqstan oblysynda alaıaqtar 1414 nómirinen jalǵan habarlama jiberip, halyqty aldap jatyr.
ShQO Polıtsııa departamenti baspasóz qyzmetiniń málimetine súıensek, óńir boıynsha ınternettegi alaıaqtarǵa aldanǵan adam sany kúnnen-kúnge artyp barady. Jyl basynan beri oblysta 200-ge jýyq adam zardap shekken.
- Alaıaqtar halyqtyń jeke derekterine jáne banktegi shottaryna qol jetkizý úshin túrli aıla-tásilderdi qoldanady. Sonyń biri – 1414 nómirinen kelgen jalǵan habarlamalar. Bul nómir negizinen eGov.kz birińǵaı portalyna tıesili. Alaıda alaıaqtar tehnıkalyq ádister arqyly osy nómirdi paıdalanyp, adamdardyń jeke málimetterin aldap alýǵa nemese telefonǵa zııandy baǵdarlamalar ornatýǵa tyrysady. Sol úshin habarlamalarǵa birden jaýap bermeı, basqa nómir arqyly eGov.kz portalyna qońyraý shalyp, onyń ras-ótirigine kóz jetkizińiz, - deıdi ShQO PD kıberqylmysqa qarsy is-qımyl basqarmasynyń bastyǵy Darhan Qamalhanov.
Sondaı-aq sońǵy ýaqytta ınternette «tez baıyp ketesiz» degen ınvestıtsııalyq usynystar kóbeıdi. Alaıaqtar qysqa merzimde kóp aqsha tabýǵa kómektesetinin aıtyp, jalǵan ınvestıtsııalyq jobalarǵa aqsha salýǵa kóndiredi.
- Taǵy bir keń taralǵan ádis – banktiń qaýipsizdik qyzmeti atynan qońyraý shalý. Bul jaǵdaıda alaıaqtar sizdiń banktik shotyńyzda kúdikti operatsııalar bolyp jatqanyn aıtyp, shuǵyl túrde karta málimetterin nemese SMS-kodty suraıdy. Ásirese, merekeler aldynda ınternet-dúkender arqyly jasalatyn alaıaqtyq belsendi túrde artady. Mysaly, Halyqaralyq áıelder kúni qarsańynda alaıaqtar gúlder men syılyqtar satatyn jalǵan saıttar ashady. Olar aldyn ala tólem jasaýdy surap, keıin tapsyrysty oryndamaı qoıady. Keıbir jaǵdaılarda, tapsyrysty jetkizý týraly habarlama jiberip, ony rastaý úshin arnaıy kod suraıdy. Bul kod arqyly olar sizdiń jeke málimetterińizge qol jetkizýi múmkin, - deıdi D.Qamalhanov.
Eske salsaq, buǵan deıin alaıaqtyq jasady dep aıyptalǵan 620 Qytaı azamaty eline qaıtarylǵany habarlanǵan.