ShQO-da jyl basynan beri 1,5 tonnaǵa jýyq balyq zańsyz aýlanǵan

ÓSKEMEN. KAZINFORM — Shyǵys Qazaqstan oblysynda ýyldyryq shashý maýsymy kezinde 92 brakonerlik faktisi tirkeldi. 

Óńir boıynsha sáýir aıynyń ortasynda bastalǵan «Ýyldyryq shashý-2025» aktsııasy máresine jetti. Bir jarym aıdyń ishindegi reıdter barysynda 117 ákimshilik quqyq buzý tirkelgen. 

— Onyń ishinde 92-si — zańsyz balyq aýlaý, 24-i — kememen qatynaý erejelerin buzý, 2-i — sý aıdyndaryn lastaý, 1-i — balyqty zańsyz tasymaldaý. Tekserý barysynda quqyq buzǵandardan 130 balyq aýlaý tory men 3 qaıyq tárkilendi. Zańsyz aýlanǵan balyqtyń jalpy salmaǵy 44 keli, — deıdi Zaısan-Ertis aımaqaralyq basseındik balyq sharýashylyǵy ınspektsııasy basshysynyń orynbasary Farhat Baıbazarov.

Salynǵan ákimshilik aıyppuldardyń jalpy somasy 2 422 000 teńgege jetken. 

Jalpy osy jyldyń basynan beri ınspektsııa 656 reıd ótkizip, nátıjesinde 1,5 tonnaǵa jýyq zańsyz aýlanǵan balyq pen 973 qural-jabdyqty tárkiledi. 

Eske salsaq, osyǵan deıin Mańǵystaýda teńiz jaǵalaýynan 279 ıtbalyqtyń óleksesi tabylǵany habarlanǵan.