ShQO-da jyl basynan beri 130-ǵa jýyq zańsyz qoqys úıindisi anyqtaldy
ÓSKEMEN. KAZINFORM — Shyǵys Qazaqstan oblysynda bıyl qatty turmystyq qaldyqtar polıgondaryna 8 jospardan tys tekserý júrgizildi.
«Qazaqstan Ǵarysh Sapary» UK» AQ júrgizgen monıtorıng nátıjesine sáıkes, jyl basynan beri óńirde qaldyqtardy zańsyz ornalastyrǵan 127 oryn anyqtalǵan. Osy kúnge deıin olardyń ekeýi tolyqtaı joıyldy. Qalǵan qoqys úıindileri boıynsha jergilikti atqarýshy organdar tıisti jumystardy jalǵastyryp jatyr.
Zańsyz qoqys úıindileri eń kóp tirkelgen aýmaqtar — Ulan, Glýbokoe aýdandary men Óskemen, Altaı qalalary. Qyzmettik mindetterin tıisinshe oryndamaǵany úshin jeti laýazymdy tulǵa ákimshilik jaýapkershilikke tartylǵan.
— Budan bólek, jyl basynan beri qatty turmystyq qaldyqtar polıgondaryna segiz jospardan tys tekserý júrgizildi. Tekserý qorytyndysy boıynsha ekologııalyq talaptardyń buzylǵany anyqtalyp, kináli tulǵalar jaýapqa tartyldy. Búginde óńirde jańa zańsyz qoqys úıindileriniń paıda bolýynyń aldyn alý sharalary júrgizilip jatyr, — dep habarlady ShQO Ekologııa departamentinen.
Eske salsaq, osyǵan deıin ShQO kásiporyndary ekologııalyq zańnamany buzǵany úshin 200 mln teńgeden astam aıyppul tólegeni habarlanǵan.
