ShQO-da jyl basynan beri 13 adam qyzylshamen aýyrdy

ÓSKEMEN. KAZINFORM – Shyǵys Qazaqstan oblysynda osy jyldyń basynan beri qyzylshanyń zerthanalyq turǵyda rastalǵan 13 jaǵdaıy tirkeldi.

ShQO Sanıtarlyq epıdemıologııalyq baqylaý departamentiniń málimetine súıensek, qyzylshamen aýyrǵandar Óskemen qalasynda (4 adam), Tarbaǵataı (8 adam) jáne Glýbokoe aýdandarynda (1 adam) anyqtalǵan.

– Onyń ishindegi balalar men 14 jasqa deıingi jasóspirimder sany – 7. Balalar arasynda aýyrǵandar sanyn azaıtý úshin birqatar sharalar qabyldanǵan. Atap aıtqanda, 6-10 aılyq balalardy qosymsha ımmýndaý bastaldy, josparly ekpeni ótkizip alǵandardy vaktsınatsııalaý uıymdastyryldy, – deıdi departament basshysynyń orynbasary Sáýle Slıamǵazına.

Óz sózinde ol ata-analarǵa úndeý jasap, balalaryna ýaqytyly ekpe saldyrtýǵa shaqyrdy.

– Eger balalaryńyz ben jaqyndaryńyz qyzylshaǵa qarsy ekpe almaǵan bolsa, tirkelgen medıtsınalyq uıymǵa baryp, shuǵyl túrde vaktsına saldyrý qajet. Qyzylshaǵa qarsy ımmýndaý – ınfektsııanyń aldyn alýdyń eń tıimdi joly, – deıdi Sáýle Slıamǵazına.

Qyzylsha – tez juǵatyn vırýstyq aýrý. Onyń negizgi belgileri: dene qyzýynyń 40,5°C-qa deıin kóterilýi, aýyz qýysy men joǵarǵy tynys joldarynyń qabynýy, konıýnktıvıt jáne teride bórtpeniń paıda bolýy.

Qyzylsha vırýsy aýamen taraıdy jáne aýada nemese túrli zattardyń betinde eki saǵatqa deıin saqtalýy múmkin. Aýrý juqtyrý úshin naýqaspen tikeleı baılanysta bolý da mindetti emes. 
Mamandardyń aıtýynsha, qyzylsha juqtyrǵan adammen baılanysta bolǵan ekpe almaǵan 10 balanyń 9-y aýrýǵa shaldyǵady.

Eske salsaq, osyǵan deıin qyzylshaǵa qarsy ekpesi joq balalar josparly emdeýge statsıonarǵa qabyldanbaıtyny habarlanǵan.