ShQO-da jergilikti sharýalardyń malyn urlap, Almaty oblysyna ótkizip kelgen adam ustaldy

ÓSKEMEN. QazAqparat – Shyǵys Qazaqstan oblysynda sharýa qojalyqtarynan 30-dan astam mal urlap, Almaty oblysyna ótkizip jibergen adam ustaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, polıtsııa qyzmetkerleri jedel-izdestirý sharalaryn júrgizý barysynda Ulan aýdanynyń aýmaǵynda uzaq ýaqyt mal urlyǵymen aınalysqan er adamdy quryqtady.

«Belgili bolǵandaı, ol 2023 jyly jergilikti sharýa qojalyqtaryna úsh ret urlyqqa túsken. Sóıtip, 33 bas maldy urlap ketti. Sodan soń maldy Almaty oblysyna ótkizip jibergen. Tártip saqshylary atalǵan óńirdegi bazarlardyń birinen maldy taýyp, jábirlenýshilerge qaıtardy. Materıaldyq zalal tolyǵymen óteldi», - delingen aqparatta.

Kúdiktige qatysty tergeý amaldary jalǵasýda. Ol Ulan aýdanyndaǵy PB-nyń ýaqytsha ustaý ızolıatoryna qamaýǵa alynǵan.