ShQO-da jer úılerge ýly gazdy anyqtaıtyn 2 myńnan astam qurylǵy tegin ornatylady

ÓSKEMEN. QazAqparat – Shyǵys Qazaqstan oblysynda turmysy tómen otbasylardyń úılerine ýly gazdy anyqtaıtyn 2 myńnan astam datchık ornatylmaq, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetinshe, qutqarýshylar áleýmettik osal sanattaǵy azamattarǵa kómek kórsetý úshin birqatar sharany qolǵa alǵan. Sonyń biri – jer úılerde pesh jaǵatyn januıalarǵa arnaıy datchıkter berý.

«Bul datchıkter turǵyndardy ıis tııýden saqtaıdy. Sebebi, jazataıym oqıǵalar kóbinese túngi ýaqytta, azamattar uıyqtap jatqanda bolady. Datchıkterdi ornatqannan keıin turǵyndar onyń batareıasyn ýaqtyly aýystyryp otyrýy kerek», - dedi oblystyq TJD bastyǵynyń orynbasary Serik Amangeldın.

Búgin departamenttiń «Qazmyrysh» JShS-men jasalǵan memorandýmy aıasynda ýly gazdy anyqtaıtyn datchıkterdiń kezekti partııasy alyndy. 2 140 datchık oblystyń qala, aýdandaryna taratylmaq. Olar turmysy tómen jáne kópbalaly otbasylardyń, múgedek adamdardyń, jalǵyz basty qarttardyń úılerine ornatylady.

Aıta ketsek, Shyǵys Qazaqstanda ýly gazdy anyqtaıtyn datchıkter talaı ret paıdasyn tıgizgen. Sońǵy úsh jylda osy qurylǵylar 7 ret iske qosylyp, nátıjesinde 30 adam, onyń ishinde 23 bala qutqaryldy.