ShQO-da jer úılerdegi órt byltyrǵydan 12%-ǵa kóp tirkelgen
ÓSKEMEN. KAZINFORM — Shyǵys Qazaqstan oblysynda bıylǵy jylytý maýsymynda jer úılerde shyqqan órt sany 12%-ǵa artyp otyr.
Jylytý maýsymy bastalǵaly beri oblystyń turǵyn úı sektorynda 65 órt tirkelgen. Bul ótken jyldyń sáıkes kezeńimen salystyrǵanda 12 paıyzǵa kóp. Sonyń saldarynan 5 adam qaza boldy.
Tirkelgen órtterdiń 28-i jeke turǵyn úılerde, taǵy 37-si aýlalar men sharýashylyq qora-jaılarda bolǵan. Órt qaýpin azaıtý maqsatynda óńirde turaqty túrde profılaktıkalyq sharalar júrgizilip jatyr.
— Búginde mundaı is-sharalar 27 myń turǵyn úı men aýlada ótkizildi. 70 myń turǵynǵa túsindirý jumystary júrgizildi. Halyqtyń áleýmettik osal toptaryna jatatyn otbasylarǵa erekshe kóńil bólinip otyr. Shyǵys Qazaqstanda peshpen jylytylatyn, osy sanattaǵy otbasylar turatyn 2 758 úı esepke alynǵan. Olardyń barlyǵy ýly gazdy anyqtaıtyn datchıktermen jabdyqtalǵan, — dep habarlady oblys ákimdiginen.
Sońǵy bes jylda óńirde 17 myńnan astam osyndaı datchık ornatylyp, olardyń der kezinde iske qosylýynyń arqasynda 42 adam aman qalǵan.
Órtke qarsy qyzmettiń materıaldyq-tehnıkalyq bazasyn nyǵaıtý jumystary da jalǵasyp keledi. Sońǵy úsh jylda jalpy quny 9 mlrd teńge bolatyn 114 arnaıy tehnıka satyp alynǵan. Altaı aýdanynda ámbebap órt sóndirý deposynyń qurylysy júrgizilip jatyr. Sondaı-aq Óskemen áýejaıynda avıatsııalyq tehnıkaǵa arnalǵan angar salý qolǵa alynǵan.
Eske salsaq, osyǵan deıin Óskemendegi saıajaıda órt shyǵyp, bir adam kóz jumǵany habarlanǵan.
